PARAGUÁI RAYHUHA

Ohai: MARIO RUBÉN ÁLVAREZ

alva@uhora.com.py

Pápa Francisco: Rovy'aiterei rasa rejuhaguére rehecha, rehendu ha reñandu ko ore retã.

Nde niko areterei guivéma rehayhu Paraguaigua ha ágã reju ore rendápe rehechaukávo upeichaha.

Yma guivéma nde orekuaa porã reikógui heta ára ore retãygua vy'a ha resay ykére Buenos Aires-pe. Reikuaháicha pe ore py'apýva, nokañýî ndehegui mba'éichapa hi'ãitéma oréve umi oreguerekóva pytûmbýpe romyengovia ára pyahu omimbipávare.

Aretéma roiko asy oîgui tetã motenondeha ijehekuérante imandu'áva ha hesaráiva opavave oiko porãva'erãha. Ágã peve roguerotyry tapicha tujukue juru akua jatevúicha okambúva Paraguáire.

Reikuaa porã kuña paraguái rembiasakue ha ipyapyha. Reiko reiko ha rejere jerénte ha nemandu'a jeýma hesekuéra. Ore pirîmbávako ne mandu'árô hesekuéra roikuaágui eréva añeteteha.

Ha'ekuéra rupi, ereháicha nde, roñakãrapu'ã Guerra Guasu rire ha ha rojetyvyro, roho tenonde, ro'a ha ropu'ã, naorekane'ôi.

Rovy'a reguerúgui hína oréve vy'a ha py'aguapy.

Vy'a rojerovia haguã ore jehe, vy'a anihaguã ore kangy, vy'a ikatu haguã romboguevi umi ndoipotáiva mboriahu oñakarapu'ã ha isã omondoho.

Py'aguapy ore resapyso haguã, ropáy haguã ha rojapo ore raperã ñepytyvô ha tekojojápe.

Nde niko rehóta hína pe Bañado Norte-pe. Rehechávo umi mboriahu rekoha rehechapaitétama mba'éichapa heta henda rupi ojeiko asy ore retãme. Heta ndahógaiva térã hóga chalaipáva, oikóva tujurýpe, tape yképe ha heta pyhare okéva py'a nandi ndoguerekóigui ho'uvarã.

Rovy'a pápa Francisco nde rejúre erévo umi ore, ára ha ára, ro'éva ha umi oguerekóva ipópe tetã sã nohendúiva araka'eve. Ne ñe'ê niko ndaha'éi oimeraêva ñe'ê. Ikatu niko ágã reho rire oike tetã sambyhyha akãme umi ne ñe'êngue ha oguata hikuái, hasypeve, oguata haguã rupi.

Ore retã niko ndaha'éi pe hûnteva. Remañávo mitã ha kakuaa resáre rehechakuaáta mba'éichapa ijetu'úrô jepe ore rekove noroñeme'êiha tekoasýpe ha py'aju ndaipu'akaiha ore rehe.

Hetárô jepe ore rapépe yvykua ha ore jokoséva, ndoropytái. Roho tenonde akã rakúpe ha heta roime roñeha'ãmbaitéva ikatu haguã hi'añete pe tetã pyahu aretéma roipotáva.

Ne ñe'ê marangatu ore pytyvône katuete ore ãguimive haguã pe ore rembipotágui.

Fuente:  ULTIMAHORA.COM (ONLINE)

Sección OPINIÓN

Viernes, 10 de julio de 2015

ENLACE INTERNO A ESPACIO DE VISITA RECOMENDADA

(Hacer click sobre la imagen)