CHE SY HA CHE RU
Autor: JOSÉ DOMINGO
.
CHE SY HA CHE RU
Mitãicha aguapýta chejojái jasýre
chupe ajerurévo che ñe’ẽ yrũrã,
aréma añandúva che ruguy syrýre
ojejapokóirõ techase rata.
. Peteĩ horýva ko’ẽju otirívo
. pohejava’ekue anga che sy ha che ru;
. upe guive aikóva che rape kytĩvo
. pore’ỹ ikyséva ha techaga’u.
Ñaimo’ã ama’ẽva mokõivéva kuãre
pembokurusúrõ ha cherovasa,
pejévaicha chéve: mamo reikoháre
yvúicha opupúne tesãi ndevegua.
. Ko’ã ore ñe’ẽre nemandu’ahápe
. kena rekekuévo eñembo emi...
. avei repáyvo eñatõi Tupãme
. tohypýi ne ãnga akói taipotĩ.
Oréko yvytúre rojokuáine ndéve
ore pyti’águi ãho kangymi;
ikatu haguãicha mayma nde rapére
okukúi nde pópe ysapy mimbi.
. Nde py renondépe py’ỹinte opu’ãne
. hakua ha hãimbéva ita hũ vai...
. péicharõ guarãke eñotỹ neakãme
. ha eraha nde pýri ore ñe’ẽmi.
Kuimba’e hekópe ohóva voínte
hembipota piári umi mombyry;
pejépako chéve: sapy’areínte
nde revy’avéirõ pya’e eju jevy.
. Ñe’ẽ ijeiretéva ahendúva upérõ
. pende py’akuágui ihekýi pyre;
. ndacherejavéiva apáy ha akévo
. ha ombo’yvotypáva mayma che rape.
Peimo’ã’ỹhágui aveve ha aháne
py’a porãitépe poñañuãmi;
upéramo aéko ambyekoviapáne
techase oikóva che ãnga kytĩ.
José D. Portillo Concepción, Sbre. 15,1945
CHE SY HA CHE RU
El bardo, tomando como punto de despegue una historia personal,
trasciende lo anecdótico particular para hender el aire de lo universal.
En su poema refleja el corazón de todo padre y toda madre de legítima prosapia cristiana.
Sus versos: dobles hexasílabos son consonantes el 2º y el 4° en todas las estrofas
y el 1° y el 3° en cinco estrofas; asonantes el l° y el 3º en cuatro estrofas.
Sus conceptos: claros. Sus figuras de dicción: acertadas y expresivas.
T.
.
Fuente: LAS CIEN MEJORES POESÍAS EN GUARANÍ . Con nuevas incorporaciones y grafía actualizada. Por PEDRO ENCINA RAMOS y TATAJYVA. Asunción-Paraguay 1997 – 425 páginas.
.
ENLACE A LA GALERÍA DE MÚSICA PARAGUAYA
EN PORTALGUARANI.COM
(Hacer CLICK sobre la imagen)
ENLACE INTERNO A ESPACIO DE VISITA RECOMENDADA
(Hacer click sobre la imagen)
Arpa Paraguaya
Letras de Música Paraguaya
MÚSICA PARAGUAYA - Poesías, Polcas y Guaranias - ESCUCHAR EN VIVO - MP3
MUSIC PARAGUAYAN - Poems, Polkas and Guaranias - LISTEN ONLINE - MP3
|
